Kurland Property Records

Document text

back to search

erg0053

OM. Wolter von Plettenberg belehnt Dietrich Buttler zu Ruhmen und seine Erben mit einem Stück Landes am Strand im Gebiet Kandau in beschriebenen Grenzen zu Lehngutsrecht. Riga, 1519 Sept. 23
Lehnsurkunde
Überlieferung:
aus A: Ausf.
Material: Perg.
Archiv: Riga, Hist. StaatsA., Best. 5561, Fb. 4, Akte 229; GStAPK, VIII. HA B 24: Sammlung Stavenhagen Urk. Nr. 256
Hide variants and comments | Show variants | Show comments | Show variants and comments |
Wye Wolther vann Plettenberch, meister to Lyfflannde Duitzsches ordenns, donn kunth, bekennenn und betugenn meth dussem unnßernn openn vorsegeldenn breve, dat wie myt willenn, rade unnd vulborde unnßer ersamenn medegebedigernn Dirick Butler tho Rumenn unnd allen sinenn rechtenn warenn ervenn gegevenn, gegunt unnd vorlent hebbenn unnd in craft dusses breves gevenn unnd vorlenen ein stucke landes am strande im gebede tho Candow in dusser naboscrevenn schedinge: innt erste annthohevenn ann deme Swarthenordeschenn wege, dar ein kule ist
vann der kulenn to gande beeth ann de openbar szee
langest de szee vorthogande beth ann ein ander kule
vann der kulenn vorth averthogannde aver denn Swartordeschenn wech starck dorch de heide wenth ann de Angersche szee, dar eine eke steit, myt enem crucze getekent, Lickoszelragge genomth
langest desulvigen szee to gande beth ann einenn andernn ekennbom, ock myt einem crucze geteketh
vann deme bome strack dorch de heide beth ann de erste vorbenomde kulenn to gande, dar sick de schedinge vann erstenn anhevet
alszo beschetlickenn, dat he off sine erve der hernn herlicheit ann deme strande nicht krenckenn sollenn unnd der hernn burenn by erenn oldenn hoyslegenn blivenn latenn, des schollenn der hernn burenn nicht furder inrumenn, alsze de oldenn hoyslege toseggenn unnd vorlenenn, myt allerleye thobehoringhe, nuth unnd beqwemicheit, wo de genomet synn off genomet mogenn werdenn, als ann ackernn geradth unnd ungeradt, hoyslegenn, wesenn, weidenn, vedrifftenn, holtinge, busschenn, birssen, woldenn, szipenn, szenn, waternn, honnichweidenn, honnichbomenn, visscherienn, vogelienn unnd allet, war gemelt Dirick unnd sine rechte warenn ervenn mogenn recht to hebbenn, nichtsnicht butenn boschedenn, vordthann tho hebbende, tho gebruckende unnd to besittende na lengudes recht tho ewigenn tydenn. Dusses inn orkunde unnd tuchnisse der warheit hebbenn wy Wolther, meister obgemelt, unnsze ingesegell witlick ann dussenn breff donn hangen. Gegevenn tho Rige fridages na Mauritii martiris na Cristi gebort inn deme vifftheinhunderstenn unnd negenteinstenn jare.