Kurland Property Records

Document text

back to search

Bauer392

Heinrich [Basedow], Bf. von Kurland, belehnt Johann Levenberch und seine Erben mit einem Stück Landes am Udrennen-Bach, das sel. Jakob Oszewolt zuvor besaß, und mit den Heuschlägen auf beiden Seiten des Bachs in beschriebenen Grenzen zu Lehngutsrecht. Pilten, 1522 Sept. 1
Lehnsurkunde
Überlieferung:
aus A: Ausf.
Material: Perg.
Archiv: Riga, Hist. StaatsA., Best. 5561, Fb. 4, Akte 241; GStAPK, VIII. HA B 24: Sammlung Stavenhagen Urk. Nr. 269
Hide variants and comments | Show variants | Show comments | Show variants and comments |
Wye Henricus, vann Gades unnde des Romesschenn stoels gnaden der kerkenn tho Curlanndt bisscopp unnde der kerkenn Darppte postulate, bekennenn unnde botugenn vor unnsz unnde alle unnsze nakamelinnge mith dusszenn unnszenn apenen vorsegeldenn breve, dath wy myth ripenn rade, wyllenn, wetenn unnde vulbort unnszerens werdigenn capittels dersulvigenn unnszer kerkenn ume getruwe unnde vlitige dennste, de de erszame, varsichtige unnde boschedene mann Johann Leuennberch, unnsze leve getruwe, unnsz unnde unnszer kerkenn Curlanndt gedann hefft unnde noch in tokamendenn tidenn alle tidt tho doennde gewilliget unnde geneget, hebbenn eme unnde allenn synen rechtenn warenn ervenn gegunt unnde vorlennt, inn crafft unnde macht dusszes breves gunnenn, gevenn unnde vorlenenn Johann vargenomet, eme unnde synenn rechtenn warenn ervenn eynn stucke lanndes, upp de Vderendesschenn beken bolegenn, alsze dath szeliger gedechtnissze Jacopp Oszewolt boszetenn unnde gebruket hefft
noch dartho gunnenn, gevenn unnde vorlenenn eme unnde synenn rechtenn warenn ervenn alle de hoyslege upp beyder sidenn der beke inn sodanenn benomedenn merkenn unnde schedinngen: innt erste, alsze menn upp de Warsouwschenn brugge kumppt, ahnn dersulvigenn bruggen antohevennde, der Warsouw tho volgennde myth der sunnenn wente ahnn dhe Sutowsschenn hoyslege, denn Sutouwsschenn hoyslegenn tho volgennde wente inn eynn sipp, genometh de Trumppewalke, dath sipp upp to gaennde wennte inn dhe Sirdenische%Syrdenische B wyrpe, de wyrpe upp to gaennde aver denn Helenn wech wennte aver eyne bruggen, genomet Proweste tilte, deme Helenn wege to volgennde wente inn denn Rapedesschenn wech, deme wege tho volgennde wennte ahnn dhe Warsouwssche bruggen, dhar syck de schedinngen ersstenn ahnnhoff
myth allerleie tobehorinngen, nudt unnde boqwemicheidenn, wo de genomet synn edder genomet mogenn werdenn, alsze ahnn ackerenn geradet unnde unngeradet, hoyslegenn, weydenn, holtinngenn, busschenn, waterenn, bekenn, honnichweydenn, honnichbomenn, visscherienn, vogelienn unnde war Johann Leuenberch unnde syne rechtenn warenn ervenn mogenn recht tho hebbenn, nichtesnicht butenn boschedenn, vorth tho hebbennde, tho bosittennde unnde tho brukennde vry unnde vredesamlikenn tho ewygenn tidenn nha leenngudes rechte. Des tho orkunde, merer sekerheit unnde tuchnissze der warheit hebbe wy Henricus, bisscopp tho Curlanndt unnde der kerkenn Darppte postulator bavenberort, sampt unnszem werdigenn capittell unnszer kerkenn Curlandt unnsze ingesegell, dath menn inn sulkenn scefftenn plecht tho brukennde, rechtes wetenndes unndenn ahnn dusszenn breff latenn hanngenn, de gegevenn unnde geschrevenn is upp unnszer kerkenn Curlandt slote Pyltenn ahm dage Egidii abbatis et confessoris anno nha der bordt unnszes herenn Jhesu Cristi dusenntviffhundertunndetweunndetwyntigstenn.(?)