Kurland Property Records

Document text

back to search

Bauer312

Bf. Martin von Kurland belehnt den Stiftsvogt Heinrich von Sacken und seine Erben mit dem von ihm gekauften Land und Gut Bahten und mit weiterem Land bei Bahten im Kirchspiel und in der Burgsuchung Amboten in beschriebenen Grenzen zu Lehngutsrecht. Amboten, 1490 Sept. 29
Lehnsurkunde
Überlieferung:
aus A: Ausf.
Material: Perg.
Archiv: Riga, Hist. StaatsA., Best. 5561, Fb. 4, Akte 140; GStAPK, VIII. HA B 24: Sammlung Stavenhagen Urk. Nr. 154
Hide variants and comments | Show variants | Show comments | Show variants and comments |
Wie Martinus, van Gades und des pawestlicken stoles gnaden bisschopp der kercken to Cwerlande, bekennen und betugen openbare myth dessem unßen openen breve, dat wy myth weten und volbart unßes werdigen capittels gegeven und vorlenet hebben und myth craft desses breves geven und vorlenen dem erbaren und wolduchtigen manne Hinrick van Sacken, nu tor tidt unßes stichtes vagede, umbe getr[u]we und vlitige denste, de he uns und unßer kercken degelicken deyt und in tokamenden tiden gerne doen wyl, em und alle synen rechten waren erven dat land und godere Baten, dat syen gekoffte kop ist. To demesulvigen gekoften lande und godere vorlene wy em und synen rechten waren erven meher landes, by deme gedachten lande Baten im kirspel und borcksokinghe Ambotten und ock in ßodanner schedinge, alß hyr navolget, belegen: inth erste antohevende an der Littysschen beke
vort van cruczen to cruczen, beth dar de Dobesche beke inflot
de Dobesche beke upp to gande beth an eynen esschenboem, myt eynem crucze getekenth
vort van cruczen to cruczen beth an den Apschen berch
den Apschen berch over to gande beth an eynen furenboem, mit eynem crucze getekenth
vort van cruczen to cruczen beth over eyn brock, dar de Spinge beke entspringet
vort van dar to gande van cruczen to cruczen over de ßerronnelewcke beth an den berch Malekalue baven der Losschen beke
vort de Lossche beke upp to gande beth an de Auuethe beke
dersulvigen beken upp to volgen beth an eynen boem, myt eynem crucze getekenth, dar eyn syepp iß
demesulvigen sype upp to volgen beth an eyn cleyn brock, dar eyn boem steyt, myt eynem crucze getekenth
van deme cleynen broke vort over eyn droge landt van cruczen to cruczen, beth dar de Trvmpsche beke entspringeth
dorch de Trvmpsche beke dwer over beth an eyn crucze
van dem crucze recht to durch den busch beth an de Sargeuppe
van der Sargeuppe dael to gande beth in de Appussche beke
desulvige beke dael to gande beth in de Wyttyssche munde
de Wyttische beke upp to gande beth an eynen berch, genomet des Slates berch
van dem berge recht durch den busch van cruczen to cruczen beth an Gedaulle brock
dorch dat brock richte to gande van cruczen to cruczen beth an den Gedysschen wech
den wech recht over to gande beth an de Bryxtel beke, dar komen dre schedinghe tohope alß Elkeßemme, Assicklandt und Warßelandt
de Brixtel upp to gande beth an de Auuethe beke
van der recht to gande dorch den busch van cruczen to cruczen beth in de Golbynne beke
de beke over to gande van crucze to cruczen beth an de Runnymunde
van der Runnymunde upp to gande beth an de Lancke
van der Lancken recht to gande beth an den steenbrock
den steenbrock dael to gande beth in de Runny
van dar vort to gande beth in de Littessche beke, dar de schedinghe ersten anhof
myt aller thobehoringhe, nuth und beqwemicheyden, alß an ackeren geradet und ungeradet, welden, weyden, hoyslegen, birschen, broken, wateren, vischeryen, wo de genomet ßyen efte genomet mogen werden, nichtisnicht buten bescheiden, und wor Hinrick vorbenomet myt alle synen rechten waren erven mach recht to hebben, to besyttende, to brukende und to beholdende fry und fredeßamlicken na leengudes rechte to ewigen tiden. Des to orkunde und tuchnisse der waerheyt ßo hebbe wye Martinus, bisschopp vorbenomet, unße ingesegel rechtes weten laten hangen an dessen bref, und dergliken tor tuchnisse und volbort ßo hevet dat werdige unße capittel och er ingesegel laten hangen an dessen sulvigen unßen breef, de gegeven ist upp unßer kercken slate Ambotten am daghe sancti Michaelis archangeli in den jaren na Cristi geborth dusenthveerhunderth und darna im negentichsten jare.