Kurland Property Records

Document text

back to search

Bauer294

Bf. Martin von Kurland belehnt Peter Bucking und seine Erben mit einem Stück Landes, genannt Bathen, in der Burgsuchung und dem Kirchspiel Amboten in beschriebenen Grenzen zu Lehngutsrecht. Amboten, 1483 Juni 29
Lehnsurkunde Text derzeit nach A. Bauers Abschrift von Kopie des 16. Jahrhunderts (B).
Überlieferung:
aus B: Kop., 16. Jh
Archiv: Riga, Hist. StaatsA., Best. 6999, Fb. 31: Brfl. Stenden, Akte 1192(?)
Hide variants and comments | Show variants | Show comments | Show variants and comments |
Wy Martynus, van Gades unnd des pabestlyken stoles gnaden bischop der kerken tho Curlande, bekennen unnd betugen myth dussem unsem breve, dat wy myth willen, wethen unnd volborth unses werdigen capitels dersulvygen unser kerken dem erbaren unnd wolduchtigen manne Peter Buckynge unnd synen rechten waren erven umme synen vlytigen unnd getrwen denste, den he von jogent an beth up dusse tidt unser kerken gedan heft unnd ock noch ihn thokamenden tyden getrwlyken don will, vorlenet hebben unnd ihn kraft dusses breves vorlenen eyn stucke landes, Bathen genomet, belegen ihn der borchsokynge unnd kerspell Ambothen ihn dusser nageschrevene marcke unnd schedynge: int erste anthoheven an der Letyschen beke, desulvyge beke daell to gahn beth yn de Alxwalke beke, desulvyge beke up tho gande beth ihn de Awtten beke, desulvygen beke dall tho gaende yn dath Lessen brock, entlanck dathsulvyge brock to gaende beth ihn de Trumpen beke, desulvyge beck daell tho gaende beth ihn de Kaltsche see, van der see vorth tho gan umme de Kaltsche sate, van der sathen vorth tho gande beth ihn de Rudde lancken, dar eyne beke is, over de beke tho gaende beth ihn de Letyschen beke, dar eyn brock is, dar eyne beke entsprynget, desulvige beke dall tho gaende beth dar men de schedynge erst anhof
myth allerley nuth unnd beqwemycheyden, wo de genomet syhn efte genomet mogen werden, nichtsnicht buthen bescheyden [bynnen] der berurden schedyng belegen, myth allen synen rechten waren erven vry tho gebruken na lengudes rechte. Des thor orkunde der warheit hebben wy Martynus, bysschop vorgerurt, unser unnd unsers capittels ere ihnsegell rechtes wetens lathen hangen an dussen breef, de gegeven unnde geschreven ist up unser kerken slote Ambothen am dage Petry unnde Pauly ihn dem jare na Christi gebort dusentveerhundert unnd darna ihm dreunndachtigsten jare.