Kurland Property Records

Document text

back to search

Bauer270

Johann Louwe, Bürger zu Goldingen, bekennt, dem Johann Scheding, Ratsherr zu Riga, 75 alte Mark Rigisch seit 14 Jahren schuldig zu sein. Er verpflichtet sich, Johann Scheding von nun an eine jährliche Rente von 4 1/2 Mark dafür zu geben und verpfändet ihm Haus und Hof in Goldingen, seinen Garten, all seine fahrende Habe und sein Landgut Nitten. o. O., 1475 Febr. 25
Pfandurkunde Text nach A. Bauers Abschrift (nach L. Arbusow) wohl von der Ausfertigung (A).
Überlieferung:
aus A(?): Ausf.
Material: Perg.
Hide variants and comments | Show variants | Show comments | Show variants and comments |
Ick Johann Louwe Lauwe, medeborger to Goldinghe in Curlande, bekenne vor alle, de dussen mynen openen breff zehen, horen edder lesen, vor my unde myne rechten erven openbar bethugende, dat ick recht[er], redeliker unde witliker schult schuldigh bin gewest vor vertein jaren langk und noch schuldigk byn dem ersamen mann heren Johann Schedinghe Schedingk, raedemann to Rige, unde synen rechten erven effte holdere dusses breves myt synem wyllen vyffundeseventigh olde m(a)r(k) Rigesch, alse in gyffte dusses breves in Lyfflande genge und geve sin, vor solt, dat ick in Ryge to vulter noghe in den tyden redeliken von hern Johann Schedinghe gekofft unde entfangen unde dit vorgerorde gelt beth an dusse tydt vry sunder alle renthe gebruket hebbe na mynem wyllen. Hirvon sall unde wyl ick Johann Louwe vorbenomt unde myne rechten erve alle jare nuw meher uthrichten unde geven hern Johann Schedinghe unde synen rechten erven effte holdere dusses breves jarliker renthe vyfftehalve m(a)r(k) Rigesch dessulvigen olden pagiments bynnen Ryge uppt dat feste lichtmissen sunder yenigerley vorder vorthogeringe by truwen und guden geloven sunder alle argelist unde geverde. Hirvor hebbe ick Johann Louwe vorgedacht unde myne rechten erve gesath to pande unde in crafft dusses breves jegenwerdigen sette unde dem vorgemelten hern Johann Schedinghe unde synen rechten erven effte holdere dusses breves vor eyn wysz, seker, vast pandt alle myne upstanden erve, liggende grunde, alse myn husz unde hoff, bynnen Goldinge belegen, unde myne garden, alse ick de nuw besitte unde myne vorvare beseten hebben, vry unde qwydt, unde alle myne varende have, kleen unde grot, darto alle myn huszgeradt unde ingedom etc., so ick dat mit mynen erven besitte unde bruke, unde alle myn redeste, dat my Godt vorlenet hefft. Hirenboven so setthe unde vorpande ick Johann Louwe vorgerort und myne erve dem mergedacten hern Johann Schedinge unde synen erven effte holderen dusses breves alle myn landtgudt, dat belegen is twe myle van Goldinge, genometh Nytten, darupp to desser tydt twe gesynde liggen, mit aller tobehoringe, dat sy an velden, busschen, ackeren, wegen, hoyslegen, wateren, honichbomen, vyscherien, heyden unde brockten, nichteznicht buten bescheden, alse ick dat nuw besitte mit myn erven unde alse myne vorffare dat besethen hebben, sunder alle argelist und behalinge. Unde weret, dat Godt nicht enwylle, dat ick Johann Louwe mit mynen erven dit also, alse vorgerort is, nicht enhelde unde myne vorberorde jarliken rente, alse vyfftehalve olde m(a)r(k) Rigesch, alle jar upp lichtmissen in Ryge sunder lengeren vortogh nicht betalede heren Johann Schedinge und synen erven edder holdere dusses breves, so denn sal unde mach her Johann vaken gedacht und syne erve effte holdere dusses breves alle dit bovengeschreven gudt, dat ick em in dussem breve benomet vorsath unde vorpandet hebbe, samptliken unde besanderen sulven antasten effte antasten laten unde sick mit Rigesschem rechte darin weldigen laten effte ock in weldigen laten unde in besittinge nemen unde dit alle holden unde bruken vry unde vredesam sunder ymandes weddersprekent, gewalt effte hindern, so lange, dat de mynste penningk mit dem meisten, de hovetsteel mit der renbe%rente?! vorgeschreven deger all betalet und gantzliken utgerichtet sy mit allen bewyszliken schaden, koste, theringe, hinder und vorsumenisse by eren truwen und gudem geloven. Des tor tuchnisse unde orkunde der warheit hebbe ich Johann Louwe vaken benomet myn ingesegel vor my und alle myne rechten erve witliken benedden an dussen breff gehangen, unde to merer sekerheit hebbe ick gebeden den ersamen man hern Johann Pekenhorst, borgemeister to Goldinge, unde Peter Luppken, borgere to Ryghe, de von myner wegen, Merten Gosschalker unde Hans Stoepp, borgere to Ryge, de van hern Johann wegen alle ere ingesegelle tor wytlicheit hebben vor dussen breff gehangen, de geven is unde geschreven in den jaren na der gebort Cristi unses hern dusentverhundert unde im vyffundeseventigesten jare am sonnavende vor dem sondage Oculi.(?)
comment
pressureDer Urkundentext folgt A. Bauers Abschrift, diese wiederum L. Arbusows Abschrift wohl von A.