Kurland Property Records

Document text

back to search

Bauer259

OM. Johann von Mengede gen. Osthof belehnt Michel von Adzel und seine Erben mit 3 Haken Landes im Gebiet und Kirchspiel Goldingen in beschriebenen Grenzen zu Lehngutsrecht. Riga, 1468 Febr. 20
Lehnsurkunde
Überlieferung:
aus A: Ausf.
Material: Perg.
Archiv: Marburg, Hess. StaatsA., Sammelstelle für baltendeutsches Kulturgut, Archiv Posen, Brfl. Groß-Iwanden (13 Perg.-Urkunden)
Hide variants and comments | Show variants | Show comments | Show variants and comments |
Wi broder Johann van Mengede, anders genanth Osthoff, meister to Lifflant Dutsches ordens, bekennen unde betugen apenbair mit dusseme apenen breve, dat wie mit rade unde volborth unsir erßamen medegebediger Michell van Adzell unde alle synen rechten waren erven gegeven unnde vorlenet hebben unde mit crafft dusses breves geven unnde vorlenen dree haken lanndes, so alse de yme gebede unnde kerspele to Goldingen unnde yn dussir nagerorden schedinge synt belegen: indt erste anthohevende an eynem broke, dar eyne kule is
van dar to gande uppe den Edesschen wech, dar eyne kule is
deme wege to volgende na Esen beth an eynen eikenboem, dar eyn cru^ecze is unde eyne kule
van dar to gaende dorch eyn brock, dar eyn steyn is mit eyneme cru^ecze
van dar tho gande beth an eyne peerde, dar eyne kule is
der peerden to volgende beth upp den Ywansschen wech, dar eyne kule is
deme wege to volgende na Ywanden beth uppe eyne brugge, dar eyn siepp is
dat siepp dal to gende beth an eynen born, dar Ryns schedinge is
Ryns schedinge upp to gaende beth an Treidden schedinge
Treiden schedinge to volgende beth an dat vorbenomede brock, dar de kule is, dar sick de schedinge erst begunde
mit allirleie tobehoringe, nutthe unde beqwemicheith, wo de genomet sien eddir genomet mogen werden, als an ackern gerodeth unde ungerodeth, hoyslagen, weßen, weiden, vedrifften, holtingen, busschen, wolden, watern, becken, seen, sipen, honnichbomen, honnichweiden, visscherien, vogelien etc., unnde wor Michel van Adzell unnde alle synen rechten waren erve vorgemelt mogen recht to hebben, nichtißnicht buten bescheiden, vortdan to hebbende, to besittende, to brukende unde to beholdende vry unnd vredeßammichlicken na leengudes rechte to ewigen tiden. Des tor orkunde unnde tor tuchnissen der warheith so hebben wie unse ingesegill undene ann dussen breeff lathen hangen, de gegeven is to Rige in den jarn na Cristi gebort dußentveirhunderth unnde darna yme achteundesostigisten ame sonnavende negist na sunthe Valentini dage.