Kurland Property Records

Document text

back to search

Bauer183

Johannes [Tirgart], Bf. von Kurland, und das Domkapitel von Riga beurkunden nähere Bestimmungen über den Verkauf des Schlosses Dondangen[{\em Dondangen 45 km onö Windau}] und der Marken Dondangen und Targele[{\em Tergeln 9 km sö der Windaumündung}]. Riga, 1434 Jan. 13
Verkaufsurkunde Gedruckt Liv-, Est- und Kurländisches Urkundenbuch Bd. 8 Nr. 765 nach der Ausfertigung.
Hide variants and comments | Show variants | Show comments | Show variants and comments |
Wy Johannes, von Godes unde des pauwestliken stoles gnaden biscopp der kerken to Curlande, unde wy Arnoldus, provest, Johannes, deken, unde dat gantze capittell der hilgen kerken to Rige bekennen unde betu^eghen in desser yegenwordigen scrift, dat mank anderen degedingen unde artikelen, de tusschen uns beiden parten von der twidracht unde schelinge wegen, de wy hadden von des slotes wegen Dondangen unde der twyer marke Dondangen unde Targele unde der gudere in densulven twen marken gelegen, vormiddelst twelf degedingesluden, de wy von beiden parten darto gekoren hadden, gehandelt unde beslaten sin mit unsere beider parte vulbord in sodaner wise, alse dat in breven uppe de eyndracht unde den kopp gemaket clarliker utgedruckt is. So sint ok desse nagescreven artikele von densulven degedingesluden mit unser beider parte willen unde vulbort gedegedinget unde beslaten, de wy sullen unde willen von beiden parten stede unde vaste holden: Int erste, wen wy Johannes, biscopp to Curlande, veftehalveduszend nye margk Rigisch betalet hebben den ersamen heren proveste, dekene unde capittele der hilgen kerken to Rige na utwisinge des breves darupp gemaket, so sulle unde love wy provest, deken unde capittell to Rige, dat slot Dondanghen mit den guderen, de wy darsulvest in den twen marken Dondangen unde Targelen in besittinge hebben, deme erwerdigen heren, heren Johanni bisscope, unde syner kerken to Curlande unvorto^egert overantworden sunder yennigerley argelist. Vortmer so moge wy provest, deken unde capittell to Rige von demesulven slote Dondanghen unde utt den ho^even unde dorperen darsulvest in Curlande, de wy in unser weer hebben, utvoren eddir utvoren laten mit den bu^eweren unde undersaten darsulvest beseten alle bewechlike gu^edere, de uns tobehorlik sin, ed sy hu^eszgerad, cleynode, korn eddir wat namen dat ed hebbe, nichtesnicht utgenomen, dat nicht nagelvast eddir ertvast sie. Ok so moge wy provest, deken unde capittel to Rige alle unse qwek, dat wy hebben in densulven hoven unde dorperen, cleyn unde grot, ed sy hu^ewr eddir ander qwek, dat uns alleyne tohort, utdryven laten mit densulven luden bitt in desse stadt Rige. Es avert in densulven dorperen qwek, uns unde densulven luden tosampne tobeho^erlik, dat sul by den luden blyven to erer nu^ett egentlik. Vortmer so sulle wy Johannes, bisscopp erbeno^emt, vor dat korn, dat den luden darsulvest von deme vogede to Dondangen gelenet is, den ersamen heren proveste, dekene unde capittele to Rige weddirgeven unde betalen eyne last rogghen unde eyne last gersten, eddir desulve last gersten afslan vor eyne last gersten, de uns, Johanni biscopp, desulven heren vom capittel to Righe schuldich sin, unde de ander last kornes voren laten deme capittel in dem do^em to Rige, alse vorgescreven steit. Ok so sulle wy Johannes, bisscopp ergeno^emet, weddirgeven unde to willen betalen alle de schulde, de hern Nicolaus Vresenberch den luden gelenet heft, ed sie an gelde, an solte, an ysern eddir wor ed ane sie. Vortan so sulle unde wille wy Johannes, biscopp to Curlande, efte unse nakomelinge unde wy Arnoldus, provest, Johannes, deken, unde capittel to Rige den breff der bestedinge unser hovedsaken von unseme hilgen vadere, dem pauwese, eddir deme gemeynen hilgen concilio mit samptliker kost beholden unde vorwerven laten. Des to merer vorwaringhe sint desser cedelen twe, eyne utt der andern gesneden, unde hebben von beiden parten unse ingesegelen an dessesulven cedelen bynedene spacium eyner yeweliken rechtes wetens laten drucken. Gegeven unde gescreven ind jar Jhesu Cristi veerteynhu^endert darna in deme veerunddortichsten jare des achten dages der hilgen dryer konighe in der stadt Rige.
comment
pressureFür einen neueren Textabdruck s. LUB 8 Nr. 765.