Kurland Property Records

Document text

back to search

erg0749

Heinrich von Sacken überläßt seinem Bruder Alexander von Sacken für seinen Todesfall all sein Gut, Land und Leute, jedoch unter der Bedingung, daß dessen Besitz im Falle von dessen erbenlosem Tod wiederum ihm, Heinrich, zufallen soll. Hof zur Wisell, 1523 Juni 6
Besitzabtretung
Überlieferung:
aus A: Ausf., Notariatsinstrument
Archiv: Riga, Hist. StaatsA., Best. 5561, Fb. 4, Akte 244; GStAPK, VIII. HA B 24: Sammlung Stavenhagen Urk. Nr. 272
Hide variants and comments | Show variants | Show comments | Show variants and comments |
Ick Hinrick vann Sackenn do kunt unnd apenbar vor idermenlick, de dussenn breff szen offt horenn leszenn, dat ick uth vrien willenn unnd wolbedachtenn mode mynem leven broder Allexander vann Sackenn upgedragenn unnd overgelatenn hebbe alle myn gudt, landt unnd lude, kleyn unnd groth, bewegelich unnd unbewegelich, allet, dat my myt rechte in der delinge thogevallen is und noch thovallen mach, unnd allenth, wes ick darthogewynnen, vorwerven unnd myth byllicheith dar bybryngenn kan, sall myn broder Allexander vorbenomet na mynem dothlicken affgange allene erven, hebben unnd beholdenn unbekummert myner andren brodere
by sodanem beschede, so Allexander, myn broder, sunder lyves erven unnd elicke fruchte vorsturve, sall wedderumme all dat syne, dat em myt rechte thovolt, uthbescheden syner elickenn husfrowenn frowelicke recht, my thofallen tho hebbende unnd tho beholdende, sunder jenygerleye anspracke, bohindernisse offt insage myner brodere offt jemandes, geistlick offth warlich, welket my myn broder Allexander in aller maten in dato updrecht unnd upgedragen hefft, gelich so ick eme myt varigenn beschede dat myne upgedragenn hebbe. Dat lave ick Hinrick van Sackenn wo vorgescreven by eren, trowenn unnd vasten cristengeloven, stede vast sunder jenigerleye intoch, behelp, argelyst off nie funde tho holden unnd dar nummer myt rade offt dade entegen tho kamende in ewicheit. Tho orkunde unnd umme merer bevestinghe der warheit hebbe ick gebeden de erbaren unnd vhestenn Diderick Butler tho Aszerem, Jacob Ffrancken unnd Hinrick Brynckenn, dat se umme gebreckes myns segels ere ingesegell unnden an dussenn breff witlickenn don hangenn, unnd hebbe dusse sulfftigen vorbenomedenn unnd denn erszamen hern Hinricum Buck, vicarium tho Tuckum, thor tuchenisse dusser sake gebeden, unnd se mede dar over unnd an genamenn. Gegeven unnde gescrevenn in deme have thor Wisell in deme jare unses Herenn dusentviffhundert darna inn deme dreundtwintigesthenn jare sunnavendes nach der hilligen drevoldicheit. [Notariatssignet] Unnd ick Hinricus Buck, clerick Szwerinssches stichtes, van pawes unnd keiserlicker walt apenbar notarius, wente alle dusse vorscreven puncte unnd articule hebbe ick personlich jegenwardich gewesenn, gehort, geszeenn unnd myt myner hant gescrevenn, ock de erbarenn unnd vestenn Dirick Butler to Aszeren, Hinrick Bryncke unnd Jacob Ffrancke thor tuchenisse ere ingesegell witlich donn beneddenn ann dussenn breff latenn hangenn, ock mit myner hant my hir unnder myns tekens unnd namen gescrevenn tho groterenn cristenngelovenn betuge unnd dartho geesschet unnd gebedenn.(?)