Kurland Property Records

Document text

back to search

erg0692

OM. Wolter von Plettenberg belehnt Friedrich von Benthem und seine Erben mit 2 Haken Landes im Gebiet und Kirchspiel Zabeln, bestehend aus im einzelnen beschriebenen Stücken Landes, mit einer Hofstätte in Zabeln, die er von den Kirchenvormündern für 20 Mark gekauft hat, mit einem von Herrn Mallinckrodt gegönnten Heuschlag und mit einem Haus im Hakelwerk Zabeln, wie es sein Vater, Hans von Benthem, und Matthias Smyt vorher besaßen, zu Lehngutsrecht. Tuckum, 1511 Sept. 9
Lehnsurkunde
Überlieferung:
aus A: Ausf.
Material: Perg.
Archiv: Riga, Hist. StaatsA., Best. 5561, Fb. 4, Akte 205; GStAPK, VIII. HA B 24: Sammlung Stavenhagen Urk. Nr. 233
Hide variants and comments | Show variants | Show comments | Show variants and comments |
Wy Wolter vann Plettenbergge, meister tho Lyfflannde Duytzschs ordenns, bekennenn unnd betuygenn appennbair in unnd myt dussem unnsem apenenn versegeldem breves, dat wy myt rade, willenn unnd vulborde unnser ersamenn mytgebediger Ffrederick vann Bennthem unnd all synenn rechtenn warenn ervenn gegevenn unnd vorlehennt hebbenn unnd in crafft dusses breves gevenn unnd vorlehennenn twe hakenn lanndes, als de im gebede unnd kerspell tho Sabell ann ackertalenn, so hir na berurt iß, belegenn sint: int erste by deme Talscheschen wege vor deme hakelwercke tho Sabell veer acker up beydenn sydenn des weges, twe stucke by Vyten lande, dree stucke by deme Rymmekulschen wege, sevenn stucke in Hennekenn schedinge, dree stucke by Sedekenn lannde, eyn stucke up Kappenn lanckenn, eyn stucke by deme Candowschen wege, eyn stucke ann deme anbergge, dartho soß hoyslege, twe up der Putzenschenn beke, twe up deme Rymmekulschenn wege, eyn achter deme hilligenn buysche unnd eyn tho Veytzenn upper Abow belegenn
noch eyn stucke lanndes, welck he myt deme cumpthur tho Goldingenn uthgebutet hefft, unnd ander lanndt, darvor gegevenn uth synem oldenn lehenbreve, in dusser nabeschrevenn schedingh belegenn: int erste antogaennde by eynem styge, de na Rinnkull geit, dar eynn steenn li[ch]t myt eynem cruytze unnd eyn kuyle gegraven is, vann dar tho gaennde tho eynem anderenn stene myt eynem cruytze unnd eyner kuylenn by Jorgenn Tomates Toyaten lande scheding, vort tho gaennde tho eynem stene myt eynem cruytze unnd eyner kuylenn, vann deme stene tho eynem anderenn steyne myt eynem cruytze unnd eyner kuyle by Benthems oldenn schedinge, de na Rinnkull geit, vann Rinnkull schedinge vort tho gaennde ann eynen eekennboem unnd eyn steenn, myt eynem cruytze getekennt, dar eyne vuchtenisse by is, tuysschenn Johann vann Oldennboickem schedinge unnd Benthems, dar eyne kule by is, vann dar tho gaennde tho eynem steyne myt eynem cruytze, vort tho gaennde tho eynem andernn stene myt eynem cruytze unnd eyne kuyle, vann deme stene tho eynem andernn stene myt eynem cruytze unnd eyne kule, noch tho eynem stene myt eynem cruytze, in der vuchtnisse gelegenn, vann dar tho gaennde ann denn erstenn steenn, dar syck de scheding erst anhevet
noch eyn stucke lanndes tegenn dussem lannde over vann dren loipstedenn, antohevennde an eyne kulenn, vann kuylen tho kuylenn ann Benthems oldenn scheding
noch eyne wartstede, belegenn tho Sabellenn tegenn deme kerckhove tuysschenn tweenn stenenn, myt cruytzenn getekennt, by deme Swentzschenn wege, welcker wortstede he vann der kerckenn vormunder vor twyntich marck gekofft hefft
noch eynenn hoyslach by Blomenouwenn scheding, de ohm her Mallinckrort gegonnt hefft, myt stenen umbher getekennt
myt allerleye thobehoringe, nutte unnd beqwemicheit, wo de genomet syn oder genomet mogenn werdenn, als an ackeren gerodet unnd ungerodet, hoyslegenn, wesenn, weydenn, vhedryfftenn, holtingen, busschenn, weldenn, brokenn, bekenn, waterenn, sypenn, stowyngenn, honichbomenn, honichweydenn, vyscheryenn, vogelyenn unnd war Ffrederick vann Benthem unnd alle syne rechtenn warenn ervenn mogenn recht tho hebbenn, nichtesnicht buten bescheydenn
item noch eyn huyß, im hakelwercke tho Sabell belegenn, myt alle syner thobehoringe, so als dat synn vader Hanß vann Benthem unnd Mathias Smyt, welcke ock dusse vorberordenn ackere, hoyslege allerfryest besettenn unnd gehat hebbenn, vort to besittennde, tho hebbennde unnd tho gebruykende vry unnd vredesamlickenn na lehenguydes rechte tho ewigenn tydenn. Orkunde unnd tuychnisse der warheit hebbe wy unnse ingesegell rechtes wettenndes benedenn an dussenn breff doin hangenn, de gegevenn unnd geschreven iß to Tuckum dynxstags na nativitatis Marie nach Christi unnsers herenn gebort im vyffteynhunderstenn unnd eylfftenn jare.(?)