Kurland Property Records

Document text

back to search

erg0690

OM. Wolter von Plettenberg belehnt Johann Meyger und seine Erben mit 7 Haken Landes, genannt Castangen, im Kirchspiel und Amt Windau in beschriebenen Grenzen zu Lehngutsrecht. Tuckum, 1511 Sept. 15
Lehnsurkunde
Überlieferung:
aus A: Ausf.
Material: Perg.
Archiv: Riga, Hist. StaatsA., Best. 5561, Fb. 4, Akte 206; GStAPK, VIII. HA B 24: Sammlung Stavenhagen Urk. Nr. 234
Hide variants and comments | Show variants | Show comments | Show variants and comments |
Wy Wolther vann Plettembergge, meister tho Lyfflannde Duytzschs ordenns, bokennenn unnd botugenn in unnd myt dussem unnsem apenenn vorsegeldenn breve, dat wy myt rade, willenn unnd vulborde unnser erszamenn medegebediger Johann Meyger im kerspell unnd ampthe thor Wynda unnd alle synen rechtenn warenn ervenn gegunt unnd vorlehennt hebbenn unnd in crafft dusses breves gonnen, gevenn unnd vorlehnenn sovenn hakenn landes, genompt Castanngen lanndt, im gebede thor Wyndau unnd in dusser nabeschrevenn schedinge belegenn: int erste anthogaende uth der Wyndau langes dess kerckherenn tho Lanssenn synenn acker byth up dat velt, dar ein kule is, vann der kulenn vor tho gaennde stracks over byth ann ein gebrokede, genomet Walnedern arre, dar eyn kule iß, vann der kulenn vorth tho gaennde langes dat gebrokete bith tho deme sype de Beiste, dar eyne kule iss, vort dat sype dale tho gaennde byth weder in denn strome Wyndau
myt allerleye thobehoringe, nutte unnd boqwemicheit, wo de genomet synn offte genomet mogenn werdenn, als ann ackerenn geradet ader ungeradet, hoyslegenn, busschen, byrssenn, holtingenn, honichbomenn, honichweidenn, vysscheryenn, vogelyenn, beekenn, szeenn, sypenn unnd allet, war gedachte Johann unnd syne rechtenn warenn ervenn mogenn recht tho hebbenn, nichtznicht butenn boscheidenn, vortann tho hebbene, tho besittene, tho gebruken unnd vann ervenn tho ervenn tho beholdenn allet na lehenguydes rechte tho ewigenn tydenn. Thor orkundt unnd tuchnisse der wairheit hebbenn wy Wolther, meister bovengenompt, unnse ingesegell rechtes wettenndes undenn ann dussenn breff doin hangenn, de gegevenn iss tho Tuckum im jare na Christi geboirt duysentvyffhundertunndeilffe maendags na nativitatis Marie.