Kurland Property Records

Document text

back to search

erg0664

OM. Johann Freitag von Loringhoven belehnt Bartholomäus Brincke und seine Erben mit zwei Haken Landes im Gebiet und Kirchspiel Tuckum jeweils in beschriebenen Grenzen, mit Haus und Hofstätte im Hakelwerk Tuckum, worin er derzeit wohnt, und weiterem Besitz, alles zu Lehngutsrecht. Burtneck, 1486 Okt. 16 Lehnsurkunde Überlieferung: aus A: Ausf. Material: Perg. Archiv: Riga, Hist. StaatsA., Best. 5561, Fb. 4, Akte 138; GStAPK, VIII. HA B 24: Sammlung Stavenhagen Urk. Nr. 152
Hide variants and comments \| Show variants \| Show comments \| Show variants and comments \|
Wie broder Johan Fridach vam Lorinchaue, meister tho Liefflande Duthsches ordens, bekennen unnde betugen apenbaer mith dissem unßem apenen breve, dat wie mith rade unnde vulborth unsir erßamen medegebediger Bertholomees Brincken unnde allen synen rechten waren erven gegeven unnde vorleneth hebben, geven unnde vorlenen in krafft disses breves eynen haken landes, so alße de im gebede unnde kerspele tho Tuckem unnde in disser nageschreven marcke unnde schedinge iß beleghen: inth erste antogaende van eyner kulen, [d]e bie dem weghe, de dar kompt van Milsekull, beleghen iß vorth van der kulen beth an eynen lovenbom lonenbom , mith eynem crucze getekenth van dem bome vorth an eynen vurenbom, mith eynem crucze getekenth vorth van dem vurenbome beth an eynen andern vurenbom, mith eynem crucze getekenth van dem bome an eynen steen mith eynem crucze van dem stene vorth an eynen ekenbom van dem ekenbome an eynen ghrenen bom van dem ghrenen bome an eynen ekenbom, mith eynem crucze getekenth vorth van der eken tho gaende in eynen dall wenthe over eyne vuchtnisse an eyne eke, mith eynem crucze getekenth van der eken an eyn stenen crucze van deme stene an eyn gebrokede dat brokede entlangk to gaende an eyn vleeth dat vleeth vorth aff to gaende wenthe an eynen hoyslach, dar eyne kule gegraven iß van der kulen beth an eynen ekenbom, de mith eynem crucze getekenth iß van der eken beth an eynen grenen bom van dem bome antogaende an de vuchtnisße, dar eyne kule iß van der kulen anthogaende wenthe an eyne hogede van der hogede beth an eyn vleeth vorth deme vlethe upp to volghen uth deme vlethe wedder upp to gaende wenthe an eyne kule van der kulen over eynen hoyslach wedder an eyne kule van der kulen wenthe an eynen steen, mith eynem crucze getekenth van dem stene antogaende den berch enthlanck wenthe an eynen ekenbom, mith cruczenn getekenth van dem bome antogaende wenthe an eyne kule van der kulen wenthe an eynen steen, mith eynem crucze getekenth van dem stene eynem weghe to volghen wenthe an eyne kule van der kulen wenthe an eynen ekenbom, mith eynem crucze getekenth van der eken an eynen berkenbom, mith eynem crucze getekenth van der berken an eyne eke, mith eynem crucze getekenth [van de]r eken eynem weghe to volghen wenthe an eyne kule, dar sick de schedinge erst anheveth. Hirtho geven unnde vorlenen wie noch in krafft disses breves Bertholomees Brincken unnde allen synen rechten waren erven eynen haken landes, so alße de ock im ampte unnde kerspele tho Tuckym in disser nageschreven marcke unnde schedinge iß belegen: inth erste antogaende van eynem brokede under dem Hunenberge vorth strack upp to gaende langes den Hunenberch wente an eyne kule vorth aff to gaende wenthe an eynen daell deme dale to volgende wente an eyne herde over de herde to tredende wenthe an eynen wech, dar eyn stenen crucze steyth van dem stenen crucze beth an eynen berkenbom, mith eynem crucze getekenth van dem bome wenthe an eyne kule van der kulen vorth wenthe an eyne vuchtnisse de vuchtnisse doer to gaende wente an eyne grunth de grunth doer to gaende wenthe an eynen eckbom, mith eynem crucze getekenth van der eken an wenthe an eyne kule van der kulen vorth an wente an eyn syepp an eynen hoyslach van dem sype vorth aff to volgende wenthe an ene eke, mith eynem crucze getekenth unnde vorth van der eken doer eyne wilthnisse strack doer tho gaende van cruczen tho cruczen wenthe an den Serkesten wech, daer eyn bom mith eynem crucze getekenth steith unnde dem weghe to volgende upp de vorder hanth wenthe upp de schedinges beke. Dartho geven unnde vorlenen wie Bartholomees Brincken unnde allen synen rechten waren erven eyn huß unnde hoffstede, dar he nu inne waneth, im hakelwerke tho Tuckem mith den garden, de tho deme huße horen, noch eyne warthstede, de Korth Nagell tho vortyden beseten hefft, unnde eyn acker mith eynem hoyslage, an deme Candawschen wege belegen, unnde eyn stucke landes, geheten Borneuelth, in syner schedinge, alße Arndt Meldaw van oldinghes her gebruket hefft, unnde eyne kalvere koppele vor deme hakelwerke unnde eynen gaerden van eynem loppstede harde an syner molth righen dith landt, huß unnde hoffstede mith allerley tobehoringe, nuth unnde beqwemicheyt, wo de genometh sien edder genometh mogen werden, alse an ackeren geradeth unnde ungeradeth, hoyslegen, weßen, weyden, vedrifften, holtingen, wolden, busschen, birßen, watern, beken, seen, sypen, honnichbomen, honnichweyden, visscheryen, vogelyen etc., unnde wor Bartholomees Brincke unnde alle syne rechten waren erven vorgemelth mogen recht to hebben, nichtisnicht buthen bescheyden, vorthan to hebbende, tho besittende, to gebrukende unnde to beholden vry unnde fredesammichlicken na leengudes rechte to ewigen tyden. Des thor orkunde unnde tuchnisse der warheyt hebben wie unße ingesegill unden an dissen breff lathen hangen, de gegeven iß to Burthnick an sunthe Gallen daghe in den jaren na Cristi geborth dusenthveerhunderth unnde im soßunndetachtich.(?)