Kurland Property Records

Document text

back to search

erg0424

Wilhelm von Ruispe, Hauptmann DO von Mitau, beurkundet einen Vergleich wegen des Totschlags, den Johann von der Hoven an einem Diener des Johann Treiden mit Namen Kilian begangen hat. Mitau, 1554 Febr. 11
rechtliche Auseinandersetzung Text derzeit nach Jahrbuch für Genealogie, Heraldik und Sphragistik 1914 S. 142 f. Nr. 2, dort nach der Ausfertigung.
Überlieferung:
A: Ausf.
Material: Pap.
Archiv: Riga, Hist. StaatsA., Best. 6999, Fb. 40: Brfl. Würzau, Akte 3
Hide variants and comments | Show variants | Show comments | Show variants and comments |
Allen unnd islicken sie kundt, witlick unnd openbaer, wue dat bie my, Wilhelm van Ruispe, Duitzsches ordens hovetman thor Mithowe, in biesiende der erbarn unnd erntvesten Johan Treidenn, Wylm van Medhem und Herman Hoykingk erschenen sint de erbarn und erntvesten Otthe Klopman, Johan Huyne, Herman von der Hove, Marx Bille und Huige Holtey und hebben my hertlichen und flitichen angelanget und gebeden umbe eine fruntlicke handelunge und vordracht tho holten und tho macken des doedtschlages und entlivunge halven, so Johan von der Hoven ahn bemelten Johan Treiden dener mit nhamenn Kylian vorungeluckett und gescheen. Imglicken dat und nachdem solchs des entliveden frunt ader vorwantschaft dar jegenworichen ock van my bogert und dartho geneget gewesen, welchs ick dan beiden parten und der sacken tho guide my angenamen und in over und biewesende upgedachter Johan Treiden als des entlivenden ock anmather und vorlother und Wylm van Medhem und Herman Hoykingk der sacken mit handels und wervesluide von beiden deilen thom besten gehandelt und einen entlicken vordracht gemaket hebben, beschedentlich und also, dat bemelter Johan von der Hoven des entlivendenn nhagelaten kindern und frouwe ader van der wegen soll und will uthrichten und geven vifhundert marck Rigesche in thwen termynen und eine last roggen und eine last gersten ahn korn, nemptlicken van dato dises breves ahn up thokamende paschenn thom ersten termyne dordehalfhundert marck und de eine last roggen und de eine last gerstenn, und von demsulvigen paschen beth up denn darnegestkamende paschen wedder tho geven und tho entrichten, des andern und lesten termyns noch dordehalfhundert marck. Darmit dan solcke vifhundert marck und de eine last rogge unnd eine last gerste thohope betalt und entrichtet sint und wesen mogen, wurvor de upbevortenn Otthe Klopmann, Johan Huyne, Herman von der Hoven, Marx Bille und Huige Holtey gelavet unnd guitgesecht und datsulvige gelt und korn up gedachte termyne my ader der in myner statt und Johan Treiden sampt der kercken vormunder thor Mithowe in nhamen und von wegen des entliveden kinder unnd frouwe thom besten, jedoch so: de kinder dat gelt und moder dat kornn tho hebben, fullenkamentlich verschaffen unnd vornögen sullen und willen. Des soll und mach ock mergedachter Johan von der Hoven meddeler tidt, jares frist der betalunge, als upgemelt, vordacht wesen, de hoge overicheitt deshalven tho besoken und de soene tho doende und tho geleistende, als sick dat tho doende gelovett. Unndt soll hirmit desulvige sacken so allenthalven gans und gaer biegelecht, doedt und vordragen sin, desulvigen kinder sampt der moder und fruntschaft oder oventhalven keiner nhummermher in ewicheitt darup tho soken mith hande oder munde, wue dat eine gestalt hebben muchte, und also vest, stede und unvorbrocklich geholden tho werden. Des tho urkhunde der vesten warheitt hebbe ick Wilhelm von Ruispe breven geschreven nevest gedachten Johan Treiden, Wylm von Medhen und Herman Hoykingk unser gewontlich pitzer tho endes dises breves willichen doen druckenn, de gegeven unnd geschreven is thor Mithowe ahm sondage Invocavit nach Christi gebort dusentvifhundert unnd im veerundviftigesten jar.