Kurland Property Records

Document text

back to search

erg0099

Johann Kloth, Komtur von Pernau, und Melchior von Galen, Vogt von Karkus, schlichten den Streit zwischen der Witwe und den Kindern Herrn Johann von Altenbockums um dessen Nachlaß dergestalt, daß die Witwe gegen Zahlung von 2000 Mark Rigisch die Güter sofort räumen, aber noch die Hälfte der Getreideernte und der fahrenden Habe erhalten soll. Wenden, 1517 Juli 16
rechtliche Auseinandersetzung Text nach E. v. Fircks, Neue Kurländische Güter-Chroniken, Mitau 1900-1905, Beil. Nr. 78, dort nach der Ausfertigung.
Überlieferung:
A: Ausf.
Material: Pap.
Hide variants and comments | Show variants | Show comments | Show variants and comments |
Vor allenn unnd ichlickenn disses breves ansichtigenn gestlicks off wertlicks standes entbeidenn wie Johann Kloth, cumpthur thor Pernaw, unnd Melcher vann Galenn, vogeth tho Carckhus, nach fruntwilligenn densthenn, groith unnd bohechlikenn willenn, hyrmyth kunth, witlick unnd openbar bekennende unnd botugende, dat sick summyge twisth twischen der erbarenn unnd dogentßamenn ffrowenn, zelige ernn Johann vonn Olden-Bokum nachgelathenn husfrowe, und gedachten hernn Johanns ervenn eynn tydtlanck her jeholdenn. Dar myt nu szodans gestilleth unnd de ervenn vann der moder myt leve unnd fruntlicheit, wo sick na dißer szakenn gestalt geborth, geschedenn mogenn werdenn, hebben sick de vormunder nach irbedunge gutliker handelunge tho rechten vor unnßernn erwerdigenn hernn meister unnd oversthenn gebadenn, dar ock de frowe inn dele thogeneth, doch dorch etzlike unnssers oversthenn rede unnd middelpersonenn, alß nemplick dey erbarnn gestrengenn unnd vesthenn hernn Szimon van der Borch, ritter, Hans Mex, Luleff Fforstenberch, Jacob Tuve vann Saxemoiße, Diderick Lode, Clawes Holstever, Hertzwich Plate, Johann Hildorp, Laurentz Schungell, Jacob Francke unnd Diderick Buthler, Jurgens sone, de sick nefenn uns disses handels inn fruntlicheit undernamenn, unnd nach veler handelunge, redenn unnd wederredenn szynn de negestenn vormunder der erven, alss nemplick heer Gerth vann der Brugge, cumpthur tho Dobbelenn, unnd her Hermenn Hasenkamp, huskumpthur tho Rige, myt gedachter frowenn inn naboschrevener fforme unnd wiße vordregenn, szo beschedentlick, dat de vormunder der erven na thokomende Michaelis der ffrowenn 2000 marck Rig(isch) sollenn und wollenn gevenn und vornogenn
des szall dey frowe szovorth thor stundt de guder gans unnd all rumenn, vorlathenn unnd vortiggenn myt averantwordunge aller szegell, breve unnd bewiße hernn Johans ervenn bolangende
darneffenn szall der frowenn dey helffte vann szomer unnd winter kornn thokomenn unnd de ander helffte denn ervenn
des szall dey frowe denn hoff wederumb myt winter kornn denn erven tho besten vann der kinder dell seggenn laten
dem geliken sall und will sze denn kelck unnd alle missegewath by sunte Annenn inn hove inn der capellenn denn erven thom besthenn blyvenn lathenn
unnd alle varne have szall halff der frowenn unnd halff den kindernn tho khomenn. Off nu jenige schulde vorhandenn werenn gewesth oder noch wernn, dar dey ffrowe ansprocke mochte tho hebbenn ader hedde, dar szall sze dat hergewede wederumb vor inn de stede boholdenn. Hyrmyth sullenn de ervenn vonn der moder und szo wederumb dey moder vann denn ervenn fruntlick gans unnd eyns vor all geschedenn szynn. Dewill dann gemelthe heer cumpthur tho Dobbelenn szodann 2000 marck inn betrachtunge der kinder nuth unnd besthe alss eynn negester vormunder vorliggen will, hebben wie, kumpthur und vogeth, myt sampt denn gestrengenn unad achtbarnn gudemanenn nicht unbillick erkanth unnd vor gudt angesehenn, dey cumpthur szodane guder inn de stede inn werenn neme thor tydt und szo lange, szodane twe dusent marck de kumpthur weder uth denn gudernn hebbe irlangeth. Dat duth alßo durch uns und upgemelte middelperßonenn gehandelt und darnach vor denn erverdigenn unßernn oversthenn unnd denn werdigenn gebedigernn inn geholdenn dage tho Wendenn fruntliker wiße is myt bolivynge beider parthe affgesprokenn, hebben wie, cumpthur unnd vogeth, myt sampt hernn Szimonn vann der Borch, ritter, Jacob Ffranck unnd Diderick Buthler, Jorgens sone, bovenngenompth unnßer ingeßegell unndenn upt spacium diesses breves druckenn lathenn. Unnd gegevenn tho Wendenn donnerdagen na divisionis apostolorum im viffteinhundersten unnd soventennden jar.(?)
comment
pressureTextabdruck nach NKGChr. Beil. Nr. 78.