Urkundentext: erg0715

OM. Wolter von Plettenberg belehnt Mathias Treiden und seine Erben mit 10 Haken Landes im Kirchspiel Durben, Krothen genannt, ferner mit zwei Horsten Landes, Nodaggen und Warmen genannt, jeweils in beschriebenen Grenzen, sowie mit 2 Haken Landes, wie diese zuvor Puszpresz und Gotschalk Ramme besaßen, alles zu Lehngutsrecht. Wenden, 1516 Dez. 23
Lehnsurkunde
Überlieferung:
aus A: Ausf.
Archiv: GStAPK, VIII. HA B 24: Sammlung Stavenhagen Urk. Nr. 248 u. 248a
Varianten und Anmerkungen aus Varianten ein Anmerkungen ein Varianten und Anmerkungen ein
Wie Wolther vann Plettennberch, meister tho Lyfflannde Duitzsches ordenns, donn kunt, bokennenn unnd botugenn myth dusszem unszenn openn vorszegeldenn breve vor idermennichlick, dath wy myth rade, willenn unnd vulborde unnszer erszamenn medegebediger gegevenn unnd vorlenth hebbenn, gevenn unnd vorlenenn hir jegenwordichlick inn crafft dusszes breves Mathis Treidenn unnd alle synenn rechtenn warenn ervenn teyn hakenn lanndes, bolegenn im kerspell thom Durbenn, Krothenn gehetenn, in disszer nageschrevenn schedinge: int erste anthohevenn by dem hilligenn bussche by einem flete, Donenbeke gehetenn, dar ene kule is
vann der kulenn der Donenbeke upp to folgenn dem grotesten strange na deme Amboteschen lande, dar eyn groth brockte is by der Donenbeke unnd eyn eikenn honnichbom, mith twen crutzenn getekenth, unnd ene kule gemaketh
vann der kulen over de Donenbeke tho gande linrecht dorch denn wolth unnd over de grunde na der Warthagen beke
vorth over de Warthagenn beke linrecht na dem Vithseckeschenn wege
deme wege to volgenn na deme Pagerbeschenn lande, dar eyn syep is
denn syp over to treden, deme wege vorth tho folgen bith an enen stein, mith enem crutze getekenth
van getekenden stene vorth to folgen van kulen tho kulenn bith in de Wartagen beke
vorth over de Warthagen beke, dar ene kule is
van der kulen linenrecht tho gande szipen und vuchtnisszenn tho volgen bith in dem hilligen bussche unnd durch den busch to gande bith an de Donenbeke, dar de erste kule is, dar dissze schedinge angefangenn is. Dartho gevenn, gunnen unnd vorlenen wy upgemeltem Mathias unnd synen erven in krafft, wo bovenn berorth, eyne horsth landes offte stucke rumes, Nodoge gehetenn, in aller mathe, szo idt Henneke Valkenhagen van oldinges her boszeten unnd gebruketh hefft allervriesth myth allem nutte, nichts buthen boscheden, unnd dath landt unnd wolde mith allem nutte twischenn Kroten unnd Nodoge, dath in disszer naboschreven schedinge is: inth erste van der Kroteschenn schedinge de Wartenbeke upp to folgen bith an de Ambotschen schedinge, der Ambotschen schedinge upp to folgen bith an eyn brock, Eke off brock gehetenn, vann deme broke inn de richte tho gande tho deme vorbenomedenn lande Nodoge, van deme lande Nodoge wedderumb eyne fuchtnissze off szipe, de dar geith off kumpth tho deme lande Vsseken, dersulvigen linenrecht tho gande na dem lande Vsszeken, unnd van dem lande Vsszeken eyne fuchtnisse off szype linenrecht tho gande na deme lande Pagarben, unnd linenrecht an dem zype tho volgende, dath der Kroteschenn schedinge is, unnd dar dath zyp in de Warthagenbeke valleth. Vorthmer noch eyne ho[rst]h landes, Warmen geheten, in disszer naboschreven schedinge: int erste vann Hennekenn visschefangk offte were in der Trumpenbeke dem water Trumpe to folgenn dem grotesten strange, de dar geith offt kumpth midden durch dath brock Rosieten
demesulven zype to folgenn bith ann dath brock Tyrelen
van dem broke upp to folgen eynem zype, dath dar kumpth off valleth van der Grobinschen lande
dar dath zyp uthspringeth van dem borne offt fonteine, linenrecht tho gande na der Grobinschen schedinge, der Grobinschen schedinge to volgen van crutzen tho crutzen, fuchtnissen, szypenn bith an eyn eldernn brock midden dor tho gande
van dem broke linenrecht van crutzen to crutzen to gande bith an denn Grobinschen helen wech
deme wege to volgen bith an eynen sten, mith eynem crutze getekenth
van deme stene van kulen to kulenn bith an eynenn eikenbom, myt twen crutzen getekenth
van deme bome linenrecht bith wedder in de Trumpenbeke. Noch gunnenn unnd vorlenenn wy em unnd synen rechten erven twe haken landes, als de bevornn Puszpresz unnd darna Gotschalck Ramme bosetenn unnd allerfriest gebruket hebben, na lude unnd inholde des hovetbreves, velegemelten Mathias von Gosschalcke myth wetten unnd willen overgelaten. Alle dissze bovengeschreven lande, beslotenn velthmarcken unnd landtguider szall unnd mach upgenanter Mathias Treiden unnd alle syne rechte warenn ervenn vry unnd fredeszamliken myth aller nuth unnd boqwemicheit, wo de genometh synn ader genometh mogenn werdenn, alß ann ackerenn, geradeth unnd ungeradeth, weszenn, weidenn, vedrifften, vischerienn, vogelienn, honnichbomenn, honnichweidenn, wyltnisse, wolde, holtinge, hude, busche, birszenn, brockte, sypstowinge unnd alleth, wor szee recht to hebbenn mogenn, nichtesnicht butenn boschedenn, tho ewigenn thidenn tho bosittenn, tho gebrukenn unnd to beholdende nha lehengudes rechte. Inn orkunde unnd mherer befestinge der warheit hebbenn wy unnsze ingeszegell witlick ann dusszenn breff donn hangenn, de gegevenn is tho Wendenn am dinxsdage nach Thome apostoli nach der geborth Christi duszentvyffhunderth unnd im sesteindenn jare.